Drangsal

I kum nua her, um di a letztes Moi in Schlåf zum wiegen
I kum nur her, um da z'sogen wia foisch'd ollawei g'legen bist
I kum nua her, wei I dia s domois so vasprochen hob
I kum nur her, um da a letztes moi Lebwoi zum sogn.

I hoff es is no ned z'spat, da mei Aufwartung zan mochn
I hoff I woa ned z'long weg, obwoi es dat mi a ned wundern
I hoff nur dasd ned glaubt host, I hätt‘ di vorsätzlich valossn
Und I hoff einfoch nur, dass I iangwonn trotzdem wieda schlofn ko.

I bin nur do, um vo jetzt bis in olle Zeit Totenwåch zan hoiten
I bin nur do, weilst as umgekehrt genauso g‘mocht hättst
I bin nur do, um ernare fåssungslosen G'sichter z‘seng
I bin nur do, um des Gråb z'seng des wos ma uns g'schauflt hom.

I hob nur fost a weng Ångst, dass I hoid donn doch einfoch z‘long weg woa
I hob nur fost a weng Ångst, I hätt‘ des ois vahindern kena wa I do gwen
I hob nur fost a weng Ångst, dass eh olle g'wusst hom, nur koana hod wos do
I hob nur fost a weng Ångst, du datst no do sei, hätt‘ mas oi ned hoitlos üwaseng.

Los mi dein Schmerz für die trågn, dein Kummer und de Låst de di plågt
Los mi des ålles üwanemma, du host as eh scho weidaus z'weit zaht
Los mi di an Zeiten erinnern, de a wonn nur kurz, weitaus sorgloser woan
Los mi einfoch dei Freind sei, nur no oa, ollerletztes moi.

Se glabn oi, dass erna oa Leben ned ausreicht, nur so wias I leb, glongt oans g‘wiss
Se glabn oi, se wissen wias gherat und hom doch no nia wirklich glebt
Se glabn oi, se hom de Åntwort g'funden zu deas so no nia a Frog gem hod
Se glabn oi, das unsare Leben vüz kurz woan, nur so wias wia glebt hom…
…hom de poa Joah woi glongt…

I bin nur do, um vo jetzt bis in olle Zeit Totenwåch zan hoiten
I bin nur do, weilst as umgekehrt genauso g‘mocht hättst
I bin nur do, um ernare fåssungslosen G'sichter z‘seng
I bin nur do, um des Gråb z'seng des wos ma uns g'schauflt hom.

Geh hoam mei Freund, jetzt is wirkli Zeit zum Åbschied nehma
Geh hoam mei Freund, koa Liacht ko heit dein Schåttn dimma
Geh hoam mei Freund, wir mirsn di jetzt zu Gråbe trågn
Geh hoam mei Freund, I hoff da Åbschied hoit nid oizu lång.